VOV4.K’ho - Đơs tàm pơrjum cri bơyai dờng màng mpồl ASEAN bè broă lơh bal tiah dềt tài gơguh lơh sa tơrgùm bal mờ tơnguh bơtàu kơl jăp geh bơyai lơh tàm drim òr (30/11) jăt broă lơh pờ tơlik tàm internet.

                    Thủ tướng Chính phủ ồng Phạm Minh Chính geh jơnau đơs tàm pơrjum

Thủ tướng Chính phủ ồng Phạm Minh Chính sồr broă lơh bal tiah dềt tàm tơngai tus pal tơrgùm tàm 3 broă geh ai lơh lài tài broă tơnguh bơtàu kơl jăp. Đơs tàm pơrjum cri bơyai, Thủ tướng Chính phủ ồng Phạm Minh Chính đơs tờm, tam klăc lơh broă bal mờ tus bal pơgồp nền nòn đah ală lơgar là bơta kuơ màng nàng tơnguh broă lơh sa tơrgùm bal mờ tơnguh bơtàu kơl jăp. Mờ lơh geh cồng nha ală bơta geh gam ơnàng tàm ală tiah dềt ai tơl bơta niam kă bro, bơcri priă ai mpồl lơh sa kă bro mờ lơh broă bal dà lơgar mờ cau dùl nă să lơh is.

Thủ tướng ồng Phạm Minh Chính pin dờn, bơh pơrjum cri bơyai sơnrờp ngan bè lơh sa bal tiah dềt dơ̆ do, geh pơn jăt tai geh sùm mờ chồl pràn broă lơh sa bal mờ tơnguh bơtàu ală tiah dềt tàm mpồl ASEAN tơnơ̆ do, pơgồp bal tàm broă lơh jăt mùl màl jơh jơnau kờñ bơ̆t bơtàu dùl mpồl bơtiàn ASEAN tơnguh bơtàu ndrờm bal, kơl jăp, pơgồp bal tàm bơta ring lơngai, ring niam lơh broă bal tàm tiah do mờ tàm dunia.

Cau mblàng Ndong Brawl