VOV4.K’ho - Thủ tướng Chính phủ ồng Phạm Minh Chính neh tus pơrjum dờng Đông Á (EAS) dơ̆ 16, bal mờ kuang bàng đơng lam ală lơgar tàm mpồl ASEAN mờ ală lơgar lơh broă bal, tàm hơ̆ geh lơgar Lo, Nhờk, Hàn Quốc, Australia, New Zealand, Ấn Độ, Nga, Mỹ mờ Tổng Thư ký mpồl ASEAN.

                     Thủ tướng Chính phủ ồng Phạm Minh Chính tàm pơrjum dờng Đông Á (EAS)

Đơs tàm pơrjum, Thủ tướng Chính phủ ồng Phạm Minh Chính đơs tờm EAS pal pơn jăt tai tơnguh gơnoar mờ bơta kuơ jŏ jòng chồl pràn broă lơh ndrờm bal, cri bơyai song dơ pă, ai geh nùs nhơm pin dờn, dong kờl bal niam mờ ală broă krơi is, tơnguh broă tam pà bal kơnòl pơgồp bal sền gàr bơta ring lơngai, ring niam, lơh broă bal tơnguh bơtàu tàm tiah do mờ tàm dunia. Thủ tướng sồr ală lơgar pal tus bal atbồ ală tam gơl di pal, geh cồng nha, tơnguh uă broă lơh bal uă lơgar, ring bal broă lơh, pơgồp bal lơh broă nàng rơcang sră geh cồng nha mờ ală bơta tơlòng gam gơtìp, kơrian broă di gơlan gơtìp ờ niam mờ chồl pràn broă tơnguh bơtàu, brồ guh kơl jăp, tàm hơ̆ uă ngan là bè lơh sa mpồl bơtiàn tơnơ̆ mờ kòp gơtờp.

Cau mblàng Ndong Brawl