VOV4.K’ho - Drim òr (26/10), Thủ tướng Chính phủ ồng Phạm Minh Chính lam bồ Mpồl kuang bàng dờng màng lơgar Việt Nam tus pơrjum jăt broă lơh pờ tơlik tàm internet Pơrjum dờng Mpồl tam klăc ală lơgar Đông Nam Á dơ̆ 38 (ASEAN 38) jăt jơnau jà bơh cau bơtau lơgar Brunei ồng Hasanal Bolkiah, Chủ tịch mpồl ASEAN nam 2021 dê.

Pơrjum dơ̆ do là dơ̆ nàng lơgar Việt Nam pơn jăt tai ai gŏ gùng dà broă lơh bal krơi is, lơh tờm, uă bơta, uă lơgar, tơrgùm bal mờ dunia tơl ală bơta mờ jrô ơnàng. Đơs tàm pơrjum, Thủ tướng Chính phủ ồng Phạm Minh Chính đơs là, bal mờ broă gàr kơl jăp cồng nha neh lơh geh, chồl pràn broă pơgồp bal tàm tiah do, bơ̆t bơtàu mpồl bơtiàn, pal geh ai tơngŏ anih ntào pa bơh mpồl ASEAN dê tàm broă lơh bal mờ ală broă lơh sa-chính trị gam ai tơngŏ wơl bơh dunia dê. Mpồl bơtiàn ASEAN pal tơnguh gơnoar là mpồl tờm bơh ală broă cri bơyai, lơh broă bal mờ pơgồp bal lơh sa uă lơgar, uă gah tàm tiah do. Nàng tus bal jrô ơnàng tàm ală broă ai geh tiah do in bal mờ gùt plai ù, tơnguh uă bơta niam bơh drà kă bro mpồl ASEAN mờ chồl pràn broă brồ guh lơh sa tơnơ̆ mờ kòp gơtờp.

Tơnơ̆ tŭ tus bal pơrjum kuang bàng dờng màng mpồl ASEAN dơ̆ 38, Thủ tướng Chính phủ ồng Phạm Minh Chính lam bồ Mpồl kuang bàng dờng màng lơgar Việt Nam tus bal pơrjum kuang bàng dờng màng mpồl ASEAN dơ̆ 39. Đơs tàm pơrjum, Thủ tướng Chính phủ ồng Phạm Minh Chính ai tơnggŏ bơta kơp kờñ geh dùl tiah ơm kis tàm tiah do ring lơngai, lơngap lơngai, kơ̆ kơljap mờ lơh broă bal nàng tơrgùm bơta pràn sơndră kòp, bơtàu tơnguh wơl mờ pơn jat tai bơtàu tơnguh pas sơm tàm dơlam mpồl.

Bulah bè hơ̆, tàm ngan ngồn den sền gŏ ală broă gơlik geh kal ke, gơ rềng tơn tus kơ̆ kơljap tàm tiah do. Thủ tướng Phạm Minh Chính kung sồr mpồl ASEAN pal geh gùng dà ring bal tềng đap ală broă tàm tiah do mờ tàm dunia; jờng rơ ală mpồl, ală lơgar lơh broă bal jat nùs nhơm geh kơnòl, bơt bơtàu, sền dờng màng adat boh lam dunia, ờ lơh gơ rềng tus ring lơngai, kơ̆ kơljap lơh broă bal mờ bơtàu tơnguh tàm tiah do, sền dờng màng gơnoar broă bơh mpồl ASEAN dê mờ tàm lùp tơl làm mờ mpồl ASEAN bơh ală broă lơh, ală dơ̆ pơrjum bơh ASEAN crơng gơs mờ tề lam, ASEAN geh gơnoar broă lơh tờm.

Cau mblàng K’Duẩn mờ Ndong Brawl