VOV4.K’ho - Drim òr (25/11), pơn jăt tai tàm broă tus còp mùl màl lơgar Nhờk, Thủ tướng Chính phủ ồng Phạm Minh Chính neh tus pơrjum hòi jà bơcri priă lơgar Việt Nam mờ lơgar Nhờk mờ tơngu me “Lơgar Việt Nam mờ lơgar Nhờk tơnguh uă broă lơh git gơ̆p, lơh broă bal tơnguh bơtàu”.

                Thủ tướng Chính phủ ồng Phạm Minh Chính geh jơnau đơs tàm pơrjum hòi jà bơcri priă

Tàm pơrjum, Thủ tướng Chính phủ ồng Phạm Minh Chính pà git, ồng pa geh dơ̆ cri bơyai geh cồng nha ngan mờ Thủ tướng lơgar Nhờk ồng Fumio Kishida mờ bàr gah ring bal tơlik jơnau yal bơr bal bàr lơgar Việt Nam mờ Nhờk, mờ đơs broă lơh git gơ̆p đah lơgar Việt Nam mờ lơgar Nhờk gam tàm tơngai niam bơnĕ ngan bơh lài tus tŭ do. Do là tiah niam ngan nàng chồl pràn broă tìp bal, tơnguh bơtàu ală broă bơh bàr lơgar, tàm hơ̆ geh broă lơh bal tơnguh bơtàu lơh sa. Thủ tướng ồng Phạm Minh Chính pà git, lơgar Việt Nam geh uă bơta gơguh niam ngan nàng ală cau bơcri priă gơtùi iang nùs bơcri mờ khà priă uă rơlao mờ jŏ jòng, lơgar Việt Nam hơ geh ai tơl bơta ƀuơn bè kơrnoăt, sră nggal nàng mpồl lơh sa kă bro, tàm hơ̆ geh mpồl lơh sa kă bro lơgar Nhờk bơcri ƀuơn, geh cồng nha tàm lơgar Việt Nam.

Cau mblàng Ndong Brawl