VOV4.K’ho- Drim òr (22/06), tàm hìu lơh broă Bộ kuang àng, Thủ tướng Chính phủ ồng Phạm Minh Chính tus pơrjum tơn jơh broă bơ̆t bơtàu, lơh jăt rơndăp broă Cơ sở dữ liệu dà lơgar bè làng bol ơm kis; Rơndăp broă lơh, ai mờ atbồ Căn cước công dân mờ pơrjum yal ngui lơh broă mùl màl broă lơh do bơh ngai 01 nhai 7 nam 2021.

Đơs tàm pơrjum, ala măt kuang đơng lam Đảng, Dà lơgar, Thủ tướng Chính phủ ồng Phạm Minh Chính neh pơn jờng ală broă lơh ngan mờ cồng nha neh lơh geh bơh Bộ kuang àng, Kuang àng ală càr, ƀòn dờng; broă lơh ngan tus bal lơh, tus bal geh cồng nha bơh ală mpồl lơh sa kă bro công nghệ thông tin tàm ală rơndăp broă lơh, pơgồp bal tàm boă bơ̆t bơtàu cơ sở dữ liệu dà lơgar bè làng bol ơm kis lơgar Việt Nam dê.

Thủ tướng đơs tờm, do là ală kơnòl kuơ màng, di pal, geh bơta lơh broă uă, geh kuơ mùl màl, geh cồng nha jŏ jòng mơya bơta tơlòng tềng đăp măt gam uă. Thủ tướng đơs là, broă bơ̆t bơtàu broă lơh do geh cồng nha mìng rơ̆p là broă lơh lài ngan, ai cơ sở dữ liệu do mŭt tàm rài kis, tơnguh geh cồng nha ngan, làng bol mờ mpồl lơh sa kă bro geh dờp ngan hơ̆ sồng là bơta kơ̆p kờñ bơh Đảng, Dà lơgar; broă kơ̆p gơn mờ kơ̆p kờñ bơh mpồl bơtiàn mờ gùt làng bol dê.

Cau mblàng Ndong Brawl