VOV4.K’ho - Drim òr (09/11), tàm hìu lơh broă Chính phủ, Thủ tướng Chính phủ ồng Phạm Minh Chính neh wă Bộ trưởng Ngoại giao lơgar Australia mò Marise Payne di tàm dơ̆ tus còp lơgar Việt Nam.

Thủ tướng Chính phủ ồng Phạm Minh Chính chờ gờm ală cồng nha Chính phủ bal mờ làng bol lơgar Australia neh lơh geh tàm broă rơcang sơndră mờ kòp Covid-19 mờ broă tơnguh wơl, tơnguh bơtàu broă lơh sa tàm tơngai do; ưn ngài Chính phủ lơgar Australia neh hơ geh dong kờl 5 tơlăk 200 rơbô ding sơnơm vaccine ai lơgar Việt Nam in mờ kơ̆p kờñ lơgar Australia pơn jăt tai bal mờ lơgar Việt Nam tàm broă rơcang sơndră mờ kòp gơtờp bal mờ tơnguh wơl, tơnguh bơtàu broă lơh sa mpồl bơtiàn... Thủ tướng đơs niam cồng nha bơh Pơrjum Bộ trưởng Ngoại giao dơ̆ 3 đah bàr lơgar, mờ đơs là do là cơng tàng pà gŏ broă lơh ngan bơh bàr gah tàm broă chồl pràn broă lơh git gơ̆p, lơh broă bal jŏ jòng. Thủ tướng Chính phủ ồng Phạm Minh Chính sồr đah lơgar Australia pơn jăt tai geh sùm broă dong kờl tơnguh bơtàu mùl màl ai lơgar Việt Nam in mờ sền sơwì broă pờ mpồng drà kă bro ờ uă phan geh lơh bơh broă lơh sa suơn sre-phan tàm dà tăc bơh lơgar Việt Nam kung bè sền sơwì broă lơh jăt broă lơh sră nggal ai gah lơh sa suơn sre ai cau lơh broă lơgar Việt Nam in; lam sồr mpồl lơh sa kă bro bàr lơgar bơcri priă kă bro.

Cau mblàng Ndong Brawl