VOV4.K’ho - Mho òr (10/09), tàm hìu lơh broă Chính phủ, Thủ tướng Chính phủ ồng Phạm Minh Chính neh wă Đại sứ lơgar Hà Lan mò Elsbeth Akkerman. Tàm dơ̆ wă, Đại sứ lơgar Hà Lan đơs Chính phủ lơgar Hà Lan sền kuơ broă lơh bal tơl ală bơta, broă lơh bal jŏ jòng bè broă gơdờp mờ tam gơl trồ tiah mờ atbồ dà mờ lơh sa suơn sre kơl jăp mờ lơgar Việt Nam, sền do là bơta tờm kơl jăp, pơgồp bal ai broă lơh git gơ̆p đah bàr Chính phủ mờ mpồl lơh sa kă bro đah bàr lơgar pơn jăt tai tơnguh bơtàu jrô ơnàng mờ geh cồng nha.

                            Thủ tướng Chính phủ ồng Phạm Minh Chính wă Đại sứ lơgar Hà Lan

Thủ tướng ồng Phạm Minh Chính hòi jà Đại sứ dan mờ Chính phủ, ală anih lơh broă gơrềng bal mờ mpồl lơh sa kă bro lơgar Hà Lan pơn jăt tai dong kờl lơgar Việt Nam gờñ geh sơnơm vaccine bơh uă broă lơh bè ai càn ha là ai ing lài, kung bè dong kờl sơnơm sơm kòp Covid-19 mờ phan lơh sơnơm ai lơgar Việt Nam in. Bè broă tàm dà lềng đah măt tơngai lik, Đại sứ mò Elsbeth Akkerman pà git, lơgar Hà Lan kờñ ală bồ tơngoh kơlôi sơnơng bơh mpồl ASEAN dê, mờ kơ̆p kờñ geh sùm bơta ring lơngai, ring niam, lơngăp lơngai, ờ do ờ dă mờ khăt gơboh gùng lòt tàm dà lềng mờ gùng rơndeh par, bơsong broă tam phà mờ ală broă lơh ring lơngai, tàm tơngu me adăt boh lam dunia, tàm hơ̆ geh Công ước Liên hợp quốc bè adăt dà lềng nam 1982.

Cau mblàng Ndong Brawl