VOV4.K’ho- Ngai 25/8, tàm hìu lơh broă Chính phủ, Thủ tướng Chính phủ ồng Phạm Minh Chính neh wă Phó Kuang atbồ lơgar Mỹ mò Kamala Harris gam geh dơ̆ lòt còp lơgar Việt Nam. Tàm dơ̆ tìp mat, cribơyai bè ală broă lơh mùl màl kờñ sơlơ tơnguh lơh broă bal 2 lơgar, Thủ tướng Phạm Minh Chính đơs nền, Việt Nam sền broă lơh sa- kă bro là gah tờm ngan mờ là bơta pràn bơh git gơp đah Việt Nam mờ Mỹ dê; sồr 2 gah pơn jat tai sơlơ lơh broă bal tàm tơngume Hiệp định bal bè Kă bro mờ bơcri priă (TIFA), mờ kung sền sơ wì bơta pràn bơt bơtàu tơnguh lơh broă bal lơh sa- kă bro pa nàng tơnguh rlau tai lơh broă bal kă bro ring niam, kơ̆ kơljap.

Tam pà bal ală jơnau đơs bơh Thủ tướng Chính phủ ồng Phạm Minh Chính dê, Phó Kuang atbồ lơgar Mỹ mò Kamala Harris đơs niam ală broă lơh ngan bơh Chính phủ Việt Nam dê tàm broă sền gròi mờ sơndră mờ kòp Covid-19, đơs nền Mỹ geh pơn jat tai dong kờl ngan ngồn nàng Việt Nam sơndră geh cồng nha mờ kòp Covid-19 mờ ală jơnau pơhìn kòp bơtờp tàm tơnơ̆ do, gàr sùm ờ lời gơtìp aniai tus mpồl tac phan gùt plai ù. Phó Kuang atbồ lơgar Mỹ yal, Mỹ pơn jat tai dong kờl Việt Nam in 1 tơlak ding sơnơm vaccine Pfizer mờ geh jun tus lơgar Việt Nam tàm pơgap 24 jơ tus.

Cau mblàng K’Duẩn