VOV4.K’ho - Drim òr (23/11), tàm càr lơgar Tokyo, lơgar Nhờk, tàm dơ̆ tus còp mùl màl sơnrờp ngan tus lơgar Nhờk, Thủ tướng ồng Phạm Minh Chính neh wă Thủ tướng lơgar Nhờk lài do ồng Yoshihide Suga, gơnoar atbồ Đảng Dân chủ Tự do (LDP) lài do, Chủ tịch mpồl tam klăc Nghị sỹ git gơ̆p lơh bơyô bal đah lơgar Nhờk mờ lơgar Việt Nam ồng Toshihiro Nikai mờ ală kuang bàng tàm mpồl tam klăc bal.

Thủ tướng Chính phủ ồng Phạm Minh Chính đơs tờm, lơgar Nhờk là lơgar geh broă lơh bal jŏ jòng, kuơ màng lài ngan lơgar Việt Nam dê; tơlik nùs nhơm chờ hờp tŭ gŏ broă lơh git gơ̆p, lơh broă bal jŏ jòng jrô ơnàng đah lơgar Việt Nam mờ lơgar Nhờk gam pơn jăt tai tơnguh bơtàu pràn kơl dang, tơl ală bơta tàm jơh ală gah broă mờ bơta pin dờn chính trị uă. Thủ tướng Chính phủ ồng Phạm Minh Chính đơs niam ală broă pơgồp bal niam, geh cồng nha bơh Thủ tướng lài do ồng Suga mờ Chủ tịch Nikai kung bè ală kung bàng tàm Mpồl tam klăc bal Nghị sĩ git gơ̆p lơh bơyô bal lơgar Nhờk mờ lơgar Việt Nam tàm broă chồl pràn broă lơh bal jŏ jòng jrô ơnàng đah bàr lơgar geh tơnguh bơtàu pràn kơl dang mờ geh cồng nha tàm ală gah broă, chồl pràn broă lơh sa, kă bro, bơcri priă mờ tìp bal làng bol; ưn ngài ală nùs nhơm git gơ̆p lơh bơyô bal, song dơ pă gơwèt mờ dà lơgar bal mờ làng bol lơgar Việt Nam.

Cau mblàng Ndong Brawl