VOV4.K’ho- Ngai 13/9, ồng Phạm Minh Chính- Thủ tướng Chính phủ neh lơh broă pờ tơlik tơn tàm internet mờ 2 càr Tiền Giang mờ Kiên Giang bè broă lơh rcang sơndră kòp Covid-19.

Gùt anih pơrjum pờ tơlik tơn tàm internet

Đơs pơn dŭt pơrjum, ồng Phạm Minh Chính đơs ngan, dơ̆ pơrjum pờ tơlik tơn tàm internet mờ 2 càr, pờ tơlik tơn tàm internet tus tàm xã, sơnah ƀòn, thị trấn nàng iăt, kơno tai jơnau đơs bơh ală Kuang bàng jak chài, geh tai bơta gĭt wă, lơh kơ̆ kơljap bơta pràn gah lơh sơnơm dê, geh bơta gĭt wă tơl làm bè ală broă lơh rcang sơndră kòp. Bàr càr Kiên Giang mờ Tiền Giang geh lơh ngan uă, lơh jat broă ai ơm yah ngài mpồl bơtiàn 2 nhai do, mơya, bàr pe poh do, bơta gơlik geh ờ hềt lơh geh bè jơnau kơ̆p kờñ. Thủ tướng lùp mờ đơs là, geh jơh bal jơnau gơbàn tờm bè broă lơh đơng lam, sồr lơh, geh jơnau gơbàn bè broă lam lơh jat. Bơh dơ̆ cribơyai tàm kấp càr, xã, sơnah ƀòn den sền gŏ ală broă lơh do kung gam geh bơta ờ hềt jơh nùs, broă lơh kung ờ hềt gĭt loh làng, lam lơh jat kung gam gơtìp rơmơ̆p ndơl, kwi kwơ; yal tơngĭt lài ală bơta ờ hềt kơ̆ kơljap, ờ hềt lơh jat nền jat mờ bơta gơlik geh bơh kòp dê. Thủ tướng Chính phủ sồr Tiền Giang mờ Kiên Giang pal lơh ngan rlau tai tàm broă lơh rcang sơndră kòp Covid-19, sơr băc mhar tơrmù ƀà bơta bơtờp uă bơh kòp dê.

Cau mblàng K’Hạnh