VOV4.K’ho - Mang ngai 23 nhai 11, jăt jơ lơgar Việt Nam, di dơ̆ tus còp mùl màl lơgar Nhờk, Thủ tướng ồng Phạm Minh Chính neh tìp măt ală cau ngăc ngar jăk chài, cau lơh broă khoa học là cau lơgar Việt Nam tàm lơgar Nhờk.

Tàm dơ̆ tìp, ală cau ngăc ngar, cau lơh broă khoa học neh yal mờ Thủ tướng ală bơta phan, cồng nha kơlôi sơnơng pa tàm ờ uă gah broă bè điện tử, năng lượng lơh geh wơl, lơh sơnơm, bơta ngăc ngar kòn bơnus lơh gơs… Chờ gờm, tam pà bal bơta chờ mờ ală cau lơh broă khoa học, Thủ tướng đơs tờm tus mờ broă kờñ tơnguh bơta kuơ kòn bơnus, bơta ngăc ngar Việt Nam, mờ pơlam bal mờ dan blơi ờ uă bơta kơlôi sơnơng mờ bơta mùl màl gam kờñ geh.

Thủ tướng kơ̆p kờñ ală cau ngăc ngar, jăk chài, cau lơh broă khoa học lơgar Việt Nam tàm lơgar Nhờk pơn jăt tai lơh ngan kơlôi sơnơng, lơh geh uă cồng nha, geh pơnrơ uă rơlao tai, ngui uă ngan broă pơgồp bal mờ mpồl ală cau lơh broă khoa học, ală mpồl khoa học tàm dunia, cèng geh bơta ngăc ngar, jơh nùs bơh să tờm nàng ai ƀòn lơgar, dà lơgar in mờ pơgồp bal tàm broă tơnguh broă lơh bơyô, lơh broă bal đah bàr lơgar Việt Nam mờ Nhờk. Kung tàm mang ngai 23 nhai 11, Thủ tướng Chính phủ ồng Phạm Minh Chính neh  geh dơ̆ tìp măt mpồl bơtiàn cau lơgar Việt Nam kis tàm lơgar Nhờk; Thủ tướng đơs, Đảng, Dà lơgar sùm ai tơl bơta niam ngan nàng làng bol kis hờ lơgar bơdìh pơgồp bal tàm broă bơ̆t bơtàu mờ tơnguh bơtàu dà lơgar.

Cau mblàng Ndong Brawl