VOV4.K’ho- Drim ngai 10/12, Thủ tướng Cíñ phủ ồng Phạm Miñ Cíñ, Kuang atbồ Mpồl đơng lam dà lơgar rơcang sơndră kòp Covid-19 (hòi lơyah là Mpồl đơng lam) neh đơng lam pơrjum pờ tơn tàm internet gùt lơgar Mpồl đơng lam dà lơgar mờ Mpồl đơng lam 63 càr, ƀòn dờng bè broă lơh rơcang sơndră kòp Covid-19.

Đơs tàm pơrjum, Thủ tướng Phạm Miñ Cíñ đơs nền, nđờ ngai do, kòp gơlik geh kal ke, geh uă cau bơtờp kòp tàm mpồl bơtiàn, cau kòp gơbàn jroă mờ cau chơt să, pơrjum dơ̆ do kờñ cribơyai tơrgùm tàm 8 mpồl broă tờm, pal ai tơlik broă lơh ngan ngồn, bơh hơ̆, gàr niam bơta ring bal bơh ală Mpồl đơng lam ală càr, ală kơnhoàl rê tus hờ xã bè jơnau kờñ, broă rơndap lơh; broă lơh rơcang sơndră kòp pal lơh jơh nùs, nền nòn, jak chài, dipal, geh cồng nha.

Thủ tướng tơngkah wơl jơnau sồr lơyài ngan rlau jơh là ngai 31/12 do pal cit tơl 2 ding sơnơm vaccine ai cau bơh 18 sơnam rlau hơđang in, cit ding dơ̆ 3 ai ală cau pal cit in. Ală tiah geh broă rơndap lơh rơcang lài mblàng yal sơlơ tơnguh jơnau git wă bơh làng bol dê, gròi sền, atbồ làng bol tàm dơ̆ ơm rlô sa tềp Tây mờ sa tềp bơhiàn yau bè lơi nàng geh ờdo ờdă.

Cau mblàng K’Duẩn