VOV4.K’ho- Mho ngai 16/12, tàm Hìu duh broă Ciñ phủ, Thủ tướng Ciñ phủ ồng Phạm Minh Chính, Kwang ătbồ Mpồl đơng lam Dà lơgar rơcăng sơndră kòp Kovid-19 đơng lam dơ̆ pơrjum pờ tơlik tơn tàm internet mờ 63 càr, ƀòn dờng nàng sền swì broă gơlik geh mờ dan broă lơh bơsong loh làng nàng kờñ tơrmù khà cau gơbàn kơn jơ̆, chơ̆t, lơh mhar broă cĭt vaccine, tơnguh tai ală anih lơh sơnơm rơcăng gàr lài mờ hìu sơnơm xã.

Do là dơ̆ pơrjum geh bơyai lơh tàm tŭ jơi tam gơl să Omicron gŏ mat mờ WHO yal tơngkah lài lơh bơtờp mhar, khih jơlai ngan ờ hềt gơtùi sền swì jơh, den tàng bè hơ̆ hòi jà jơh dunia pơn jăt tai rơcăng ngăc, ờ gŏ di sền ờ sờp, ờ kơrhia. Thủ tướng Ciñ phủ ồng Phạm Minh Chính đơs sùm, tŭ do, broă tàm lơgar tŭ do gơbàn gam kal ke; tàm bàr pe càr, anih kờñ pal pơn jăt tai cribơyai, sền swì tàm làm gùt lơgar nàng geh ală broă lơh bơsong loh làng, ngan ngồn nàng kràñ cê jơh nùs, kơryan ală cau bơtờp tàm mpồl bơtiàn, ngan là ală cau gơbàn kòp kơn jơ̆, gròi sền tus geh ală cau chơ̆t. Jăt Thủ tướng Ciñ phủ ồng Phạm Minh Chính, đơs, kờñ pal tơrgùm cribơyai broă lơh tơnguh mhar broă cĭt vaccine, lam cĭt vaccine ai kơnòm dềt bơh 12 tus 18 sơnam in nàng ai ală oh in geh lòt bơsram wơl bè ờs. Ală càr, ƀòn dờng lơh jăt ală broă lơh rơcăng sơndră kòp dipal, gàr niam broă lơh sa, kă bro.

Cau mblàng Lơ Mu K’Yến