VOV4.K’ho- Di dơ̆ tơngkah Ngai Kơnràñ lik lìng nam 2021, mho ngai 17/12, Thủ tướng Ciñ phủ ồng Phạm Minh Chính neh lòt còp, nting bơr gờm chờ Noel nam 2021 ală cau kơđang yàng, cau duh broă yàng mờ làng bol jăt Yàng Bàp tàm càr Bà Riạ- Vũng Tàu. Lòt còp Hìu yàng bàp Long Hương mờ còp Toà Giáo mục càr Bà Riạ- Vũng Tàu, Thủ tướng ồng Phạm Minh Chính kơ̆p kờñ làng bol jăt yàng bàp pơn jăt tai đòm jăt nùs nhơm “duh rơngòt yàng, kờñ gơboh dà lơgar”, lơh jăt gùng dà broă lơh, jơnau sồr bơh Đảng dê, kơrnoăt boh lam bơh dà lơgar dê, lơh ngan brồ guh nàng geh rài kis ngai sơlơ hờm ram, chờ hờp, tam klăc, tàm kờñ gơboh, tàm dong kờl bal mờ gơ̆p, bơ̆t bơtàu ƀòn lơgar, dà lơgar ngai sơlơ bơtàu tơnguh.

Thủ tướng kung sồr kấp ủy, gơnoar ătbồ kơlôi rơcăng broă cĭt vaccine mờ sồr bàp yàng hòi jà làng bol jăt yàng bàp đơs is mờ làng bol đơs bal jơh nùs cĭt vaccine, tài bơta pràn kơldang să jan, să tờm, hìu bơnhă mờ mpồl bơtiàn in. Mơkung lơh jăt niam ală broă lơh rơcăng sơndră kòp bè 5k, yờ tơnguh uă nùs nhơm gĭt wă làng bol dê.

Cau mblàng Lơ Mu K’Yến