VOV4.K’ho- Drim ngai 14/12, tàm Hà Nội, Thủ tướng Cíñ phủ ồng Phạm Minh Chính neh tus bal broă lơh Tềl sơn đờm mut lơh broă tam gơl pa, bơceh pa dà lơgar mờ Poh tam gơl pa, bơceh pa mờ sơn đờm mut lơh broă ƀòn dờng Hồ Chí Minh (TECHFEST mờ WHISE nam 2021) bơh Ƀộ Khoa học mờ Kong nghệ pơgồp bal mờ Ƀộ Ngoại giao, Ủy ban Ñân dân ƀòn dờng Hồ Chí Minh, Cơldŭ kă bro mờ lơh sa mờ măi mok Việt Nam bơyai lơh jat broă lơh pơrjum tơn mờ pờ tơlik tơn tàm internet mờ 63 anih pờ tơlik tơn tàm ală càr, ƀòn dờng mờ mờr 20 lơgar tàm dunia.

Broă lơh Tềl sơn đờmmut lơh broă tam gơl pa bơceh pa dà lơgar mờ Poh tam gơl pa, bơceh pa mờ sơn đờm mut lơh broă ƀòn dờng Hồ Chí Minh mờ jơnau kờñ wèt tus: ai tơlik jơnau kơlôi sơnơng, ai tơlik ală jơnau bơceh pa, tơrbŏ bal tàm ală broă sơn đờm mut lơh broă bơceh pa dà lơgar. TECHFEST nam 2021 sơlơ tơrbŏ kơ̆ dang che tam klac bal ờ geh bơta kơryan đah kòn bơnus Việt Nam, bồ tơngoh jak Việt Nam mờ bơta kơp kờñ Việt Nam.

Đơs tàm broă lơh, Thủ tướng Cíñ phủ ồng Phạm Minh Chính đơs là, tam gơl pa, bơceh pa là jơnau sồr dipal bơh bơta bơtàu tơnguh dê. Thủ tướng sồr ală kấp, ală gah broă lơh tơn jơh wơl broă lơh tam gơl pa, bơceh pa nàng geh cơ sở dữ liệu, jơnau bơsram, mờng chài ai tam gơl pa, bơceh pa in tŭ do mờ tàm tơngai tus.

Cau mblàng K’Duẩn