VOV4.K’ho - Drim òr (28/12), Thủ tướng Cíñ phủ ồng Phạm Minh Chính tus bal mờ broă lơh “75 rơbô jơnau bơceh lơh, sơrlèt mờ kal ke, tơnguh bơtàu” geh Tổng Liên đoàn Lao động Việt Nam bơyai lơh. Broă lơh “75 rơbô jơnau bơceh lơh, sơrlèt mờ kal ke, tơnguh bơtàu” geh lam sồr tơnơ̆ mờ cồng nha bơh pơrjum dờng gùt lơgar dơ̆ 13 Đảng dê, di tàm tŭ gùt lơgar tus bal rơcang sơndră mờ kòp Kovid-19.

Tơnơ̆ mờ mờr 80 ngai pơrlòng lơh, neh geh 250 rơbô 177 jơnau bơceh lơh, sơrlèt mờ rơlao 300% pơn drờm mờ jơnau kờñ geh ai. Tơngu me bơceh lơh tus bal broă lơh geh uă bơta, geh tàm uă gah broă, broă lơh mờ broă tus bal. Đơs tàm broă lơh, Thủ tướng Cíñ phủ ồng Phạm Minh Chính pơn jờng mờ chờ gờm ală mpồl lơh broă bal mờ cau dùl nă să geh jơnau bơceh lơh mờ cồng nha jăk chài, geh pơnrơ ngan geh pơn jờng tàm ngai do. Thủ tướng đơs tờm, Đảng mờ Dà lơgar he sùm bơ̆t bơtàu, sền kuơ broă bơceh lơh, broă mờng chài bơh ală làng bol, tàm hơ̆ uă ngan là jơnau bơceh lơh, broă mờng chài bơh ală cau lơh broă.

Thủ tướng kơ̆p kờñ broă lơh “01 tơlăk jơnau bơceh lơh-broă lơh ngan sơrlèt mờ kal ke, bơceh lơh, lơh ngan lơh geh cồng nha mờ kòp Kovid-19” geh pơn jăt tai cồng nha do, tơnguh bơta pràn kơl dang, cồng nha mùl màl, pơgồp bal uă rơlao tai tus tơl anih lơh broă, mpồl lơh broă, cau dùl nă să.

Cau mblàng Ndong Brawl