VOV4.K’ho - Thủ tướng Cíñ phủ ồng Phạm Minh Chính tus pơrjum tơn jơh gah Tài cíñ nam 2021 mờ lơh jăt broă lơh rơndăp nam 2022.

                        Thủ tướng Cíñ phủ ồng Phạm Minh Chính geh jơnau đơng lam tàm pơrjum

Đơs tàm Pơrjum, Thủ tướng Cíñ phủ ồng Phạm Minh Chính sồr, Gah Tài cíñ pal bơyai lơh đơng lam tă kes priă dà lơgar nam 2022 nền nòn, tềm pềr, geh cồng nha, tàm bơta kờp dŭ Quốk hội geh ai; gàr niam broă lơh jăt ală kơnòl tă priă kuơ màng, tơrgùm bơta pràn tàm broă rơcang sơndră mờ kòp Kovid-19, ală kơnòl ni sơna, jal mhar, chồl pràn broă bơcri priă dà lơgar, ai geh bơta pràn broă brồ guh mờ chồl pràn broă gơguh lơh sa.

Thủ tướng pin dờn là mờ bơhiàn 76 nam bơ̆t bơtàu mờ tơnguh bơtàu, broă lơh ngan bơh gùt mpồl kwang bàng đơng lam, công chức, viên chức, cau lơh broă bơh gah do, gah Tài cíñ pơn jăt tai sơrlèt mờ kal ke mờ lơh gơs jăk chài ală jơnau kờñ, kơnòl priă jền-kes priă dà lơgar, lơh jăt niam broă brồ guh mờ tơnguh bơtàu lơh sa mpồl bơtiàn, pơgồp bal tàm broă lơh gơs rơndăp broă tơnguh bơtàu lơh sa mpồl bơtiàn nam 2022 bơh gùt lơgar, ai geh bơta ƀuơn nàng lơh jăt rơndăp broă tơnguh bơtàu lơh sa mpồl bơtiàn 5 nam bơh nam 2021 tus 2025 mờ broă lơh jŏ jòng 10 nam bơh nam 2021 tus 2030 jăt di mờ kơrnoăt bơh pơrjum dờng dơ̆ 13 Đảng neh ai.

Cau mblàng Ndong Brawl