VOV4.K’ho- Drim ngai 29/12, tàm Hà Nội, Thủ tướng Cíñ phủ ồng Phạm Minh Chính tus bal Pơrjum pờ tơlik tàm internet gùt lơgar tơn jơh broă lơh nam 2021, lam lơh broă rơndap lơh nam 2022 bơh gah Nông nghiệp mờ Phát triển Nông thôn dê bơh Ƀộ Nông nghiệp mờ Phát triển Nông thôn bơyai lơh. Nam 2021, gah Nông nghiệp mờ Phát triển Nông thôn pơn jat tai lam lơh kơnòl broă tàm tơngai pal kong mờ uă kal ke, bơta lòng; bulah bè hơ̆ kung gam geh bơta gơguh pràn ngan, lơh geh jơnau kờñ dơ̆ lĕ bal: ờ mìng rơcang sơndră kòp geh cồng nha mờ gam chồl pràn lơh sa bơtàu tơnguh, drơng tơl làm jơnau kờñ ngui sa tàm lơgar mờ tac hờ lơgar ndai. Nam 2021, priă lơh geh gơguh uă jơh gùt gah do gơguh bơh 2,85 tus 2,9%, priă lơh geh bơh tac phan hờ lơgar ndai gùt gah do geh 48 tơmàn 600 tơlak dollar Mỹ. Uă broă geh jàu bè bơtàu tơnguh bơh gah do dê neh lơh geh mờ sơrlèt rlau broă rơndap lơh ai tơlik.

Nam 2022, jơh gùt gah do tơrgùm lam lơh jơh nùs rơndap sap sèng wơl jat gùng dà tơnguh bơta kuơ gơguh uă mờ bơtàu tơnguh kơ̆ kơljap. Đơs pơn dut pơrjum, Thủ tướng Cíñ phủ ồng Phạm Minh Chính sồr jơh gùt gah do pal pơlam lơh jat kơnòl broă gơ dờp ờdo ờdă, ngac ngar, gròi sền geh cồng nha kòp Kovid-19, sền gàr uă ngan rlau jơh pràn kơldăng să jan, màng kis bơh làng bol dê, pơn jat tai tă bơsong kal ke ai broă lơh sa, kă bro in, dong kờl geh cồng nha làng bol mờ mpồl lơh sa kă bro. Ngui tơl bơta ƀuơn nàng chồl pràn bơtàu tơnguh wơl mờ bơtàu tơnguh lơh sa mpồl bơtiàn, bơtàu tơnguh gah lơh sa suơn sre tàm bơta bè ờs pa.

Cau mblàng K’Duẩn