VOV4.K’ho- Ngai 07/9, ồng Phạm Minh Chính– Thủ tướng Chính phủ đơng lam pơrjum pờ tơlik tơn tàm internet mờ Chính phủ, ală Bộ, gah lơh broă geh gơrềng mờ ală càr, ƀòn dờng geh dà lềng bè kơryan tơnhào phan tàm dà lềng tìs mờ adat boh lam, ờ yal mờ ờ lơh jat jơnau sồr. Tàm dơ̆ pơrjum, ală tiah jat kềng gah dà lềng neh yal mờ  Thủ tướng Chính phủ in bè bơta lơh jat jơnau sồr bơh ală tiah he dê, mơkung pơyoa tus mờ Chính phủ, Thủ tướng Chính phủ in ală jơnau đơs, jơnau dan mờ kung neh hơ mờ Thủ tướng jơh nùs lơh ngan ờ lời bơta do gơlik geh.

Đơs pơn dŭt pơrjum, Thủ tướng đơs loh, jat broă lơh jŏ jòng bơtàu tơnguh phan tàm dà Việt Nam dê, tus nam 2030, khà phan tàm dà lơh geh 10 tơlak tấn mờ priă lơh geh bơh broă tăc mờ lơgar ndai pơgap bơh 14 tus 16 tơmàn dolar Mỹ. Bơta geh mat mờ lơh broă bơh làng bol lơh ka tàm ală tiah dà lềng neh bơsong broă lơh, rài kis lơh broă sa ai pơgap 1 tơlak nă làng bol lơh ka in mờ 4 tơlak nă cau geh gơrềng; pơgồp bơnah bơtàu tơnguh geh phan tàm dà, tơnguh rài kis làng bol dê, bơtàu tơnguh lơh sa dà lơgar, pơgồp bơnah kuơ màng tàm broă sền gàr bơta lơngap lơngai, gơnoar tờm dà lềng, ƀồt dà lềng bơh Dà lơgar dê.

Cau mblàng K’Hạnh