VOV4.K’ho - Drim òr (17/08), Thủ tướng ồng Phạm Minh Chính neh đơng lam, lam sồr dơ̆ pơrjum Chính phủ tơngu me adăt boh lam nhai 8 nam 2021. Đơs tàm pơrjum, Thủ tướng ồng Phạm Minh Chính đơs loh, lơh jăt Nghị quyết pơrjum dờng dơ̆ 13 bơh Đảng, broă lơh bơh Chính phủ, kơnòl 6 nhai, tơrgùm lơh jăt 3 broă lơh pràn jŏ jòng, 6 kơnòl tờm, 12 kơnòl kuơ màng tàm tơngai lơh broă do, tàm hơ̆ geh bơ̆t bơtàu kơrnoăt boh lam.

Thủ tướng sồr, ală Bộ trưởng tơnguh uă ngan nùs nhơm geh kơnòl tài làng bol tài dà lơgar, tơrgùm đơng lam, lam sồr tơl ală bơta broă, tơrgùm bơ̆t bơtàu kơrnoăt boh lam, 3 broă lơh pràn jŏ jòng. Tiah lơi gam kal ke den sền wơl, bơsong di jăt mờ ală kơrnoăt bơh Đảng, Dà lơgar. Tŭ neh ring bal den lơh jăt kơrnoăt tơrgùm làng bol lơh tờm, cau ờ gal lơh jăt cau gal, cau dùl nă să lơh jăt cau tàm mpồl, gơnoar hờ đơm lơh jăt gơnoar hờ đang. Sơlơ kal ke, sơlơ glar bòl sơlơ ring bal, sơlơ kờñ geh bal dùl jơnau đơs. Tàm tiah lơi, tŭ lơi kung pal tam klăc, cau lam bồ pal dờp kơnòl. Broă là he kờñ dùl nùs bal, tam klăc bal, ring bal.

Cau mblàng Ndong Brawl