VOV4.K’ho- Mho ngai (17/05), tàm Văn phòng Chính phủ, ồng Phạm Minh Chính Thủ tướng Chính phủ neh đơng lam dơ̆ pơrjum Thường trực Chính phủ bè broă lơh rcang sơndră kòp Covid-19; nàng kờñ ai tơlik ală jơnau lơh nền di tŭ bè broă blơi bơh lơgar ndai, lơh gơlik, bơyai lơh cĭt sơnơm vaccine mờ rơndap ai hòi jà tă pơgồp bơta pràn lơh jat. Tŭ do, bơta kòp kung gam gơlik geh kal ke, ờ gơtùi gĭt lài, ngan là tàm ală tiah kòp tàm càr Bắc Giang mờ Bắc Ninh, tiah tơrgùm uă tiah lơh sa mờ măy mok, geh uă công nhân lơh broă mờ uă cau gơtìp bơtờp kòp.

Thủ tướng Chính phủ đơs sùm, jơnau kờñ kung gam là lơh jat jơnau kờñ dơ̆ lĕ bal “rcang sơndră kòp mờ bơtàu tơnguh lơh sa- mpồl bơtiàn”, gàr niam bơta ờ do ờdă ai dơ̆ tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026; tơn jơh niam bơnĕ nam bơsram 2021; ai broă dong kờl, sền gàr pràn kơl dang să jan làng bol dê là hơđang rlau jơh mờ lài ngan rlau jơh.

Cau mblàng K’Hạnh