VOV4.K’ho- Drim ngai 30/8, tàm Hà Nội geh lơh Pơrjum tă pơgồp jơnau đơs tàm jơnau rơcang cih jơnau yal tơn jơh Nghị quyết sồ 19 bơh Pơrjum dơ̆ 6, Ban Chấp hành Đảng dà lơgar khóa 11 dê bè pơn jat tai tam gơl pa broă lơh, adat boh lam bè ù tiah tàm tŭ tơngai chồl pràn tơl làm broă lơh tam gơl pa, lơh gơlik bơnàng jă nàng tus nam 2020 lơgar he gơ gơs là lơgar lơh sa mờ măi mok jat gùng dà tam gơl pa.

Đơs mut pơrjum, Thủ tướng Phạm Minh Chính, Kuang atbồ Mpồl đơng lam đơs nền: Tơnơ̆ mờr 10 nam lơh jat Nghị quyết sồ 19, bol he neh lơh geh uă cồng nha kuơmàng tàm broă tơnguh bơta pràn bơh ù tiah ai bơtàu tơnguh lơh sa- mpồl bơtiàn in, pơgồp bơnah gàr niam ring bal mờ kơ̆ kơljap mpồl bơtiàn, sền gàr dà lơgar, sền gàr lơngap lơngai; sền gàr tiah ơm kis mờ gơ rờm bal mờ tam gơl trồ tiah. Bulah bè hơ̆ tàm broă lam lơh kung gam uă bơta ờ niam. Bè hơ̆ den tàng, Ban Bí thư neh ai tơlik Kơrnuat crơng gơs Mpồl đơng lam tơn jơh 10 nam lơh jat Nghị quyết sồ 19. Thủ tướng sồr ală kuang bàng tơrgùm cribơyai tàm ală cồng nha lơh geh, ală bơta ờ niam mờ jơnau bơh tài gơlik geh tàm tŭ lơh jat Nghị quyết sồ 19, kuơmàng là ală jơnau gơtùi git lài.

Cau mblàng K’Duẩn