VOV4.K’ho- Broă lơh tơlik mat Kes priă vaccine rcang sơndră kòp Covid-19 geh bơyai lơh tàm mang ngai dơ̆ 7, ngai 5/6/2021, tàm Hà Nội. Ồng Phạm Minh Chính_ Thủ tướng Chính phủ geh bal mờ Kuang đơng lam bồ Mặt trận dà lơgar Việt Nam, ală bộ, gah sơnah lơh broă, mpồl cau lơh broă chính trị mpồl bơtiàn, ala mat làng bol mờ mpồl bơtiàn lơh sa kă bro geh tus bal broă lơh kuơ màng mờ geh kuơ uă ngan do dê.

Thủ tướng Chính phủ ồng Phạm Minh Chính

Broă lơh geh bơyai lơh nàng kờñ hòi jà làng bol, cau ling gùt lơgar, làng bol Việt Nam kis tàm lơgar ndai, ală mpồl lơh sa kă bro, cau lơh sa dùl nă să is, tơl mpồl cau, cau dùl nă să is tàm lơgar mờ bơdìh lơgar tus bal is tă pơgồp bal, dong kờl, ai Kes priă vaccine rcang kòp Covid-19 mờ nùs nhơm geh kơnòl tài bơh pràn kơl dang să jan tơl nă cau in, tài bơh mpồl bơtiàn, tài bơh dà lơgar, jơi bơtiàn bal mờ nùs nhơm tam klăc bal dunia, sơm bat tê bal kơryan kòp tàm tơl lơgar mờ gùt plai ù. Kờp dŭ Việt Nam kờñ blơi 150 tơlak ding sơnơm vaccine rcang sơndră kòp Covid-19 nàng cĭt rcang sơndră lài kòp ai pơgap 75 tơlak nă làng bol in, mờ kờp jơh jơnau kờñ geh priă jền kờp dŭ pơgap 25 rơbô 200 tơmàn đong.

Cau mblàng K’Hạnh