VOV4.K’ho - Drim òr (10/01), tàm hìu lơh broă Cíñ phủ, Thủ tướng Cíñ phủ ồng Phạm Minh Chính bal mờ Thủ tướng Cíñ phủ lơgar Lào ồng Phankham Viphavanh neh đơng lam bal Pơrjum dơ̆ 44 Ủy ƀan bàr Cíñ phủ bè broă lơh broă bal đah bàr lơgar Việt Nam mờ Lào.

                                    Pơrjum dơ̆ 44 Ủy ƀan Cíñ phủ bàr lơgar Việt Nam mờ Lào

Bàr gah neh ring bal, mùl màl jơh ală jơnau đơs pơn dŭt bơh bàr Ƀộ Cíñ trị mờ Jơnau ring bal rơndăp broă lơh bal đah bàr lơgar nam 2022, ring bal bơyai lơh jăt pràn tơn bơh bồ nam nàng chồl pràn broă lơh bal tàm jơh ală gah broă cíñ trị-lơh broă bal mờ lơgar ndai-sền gàr bơta lơngăp lơngai dà lơgar, bơcri priă-kă bro. Ală tơngu me mờ gùng dà cri bơyai tàm Pơrjum dơ̆ do geh kuơ màng tàm broă lơh mùl màl jơh ală jơnau ring bal lơh broă bal dờng, dong kờl ală Ƀộ, gah lơh broă, ală càr, ƀòn dờng, mpồl lơh sa kă bro bàr lơgar ƀuơn rơlao tàm broă lơh jăt ală broă lơh bal, wèt tus lơh geh cồng nha Rơndăp broă lơh bal nam 2022. Tơnơ̆ mờ pơrjum, bàr Thủ tướng neh sền broă kĭ jơnau hơ bal, jào 9 pang sră lơh broă bal đah Cíñ phủ mờ ală ƀộ, gah lơh broă dà lơgar, anih lơh broă, mpồl lơh sa kă bro bàr lơgar.

Cau mblàng Ndong Brawl