VOV4.K’ho- Drim ngai 07/6, Thủ tướng Chính phủ ồng Phạm Minh Chính lơh broă mờ kuang đơng lam bồ ală Bộ, gah broă lơh, ală cau khoa học, ala mat ală viện kơlôi sơnơng, ală mpồl lơh gơlik sơnơm vaccine bè broă lơh kơlôi sơnơng, lơh gơlik sơnơm vaccine rơcang sơndră kòp Covid-19. Ala mat Bộ Y tế neh yal mờ Thủ tướng bè 2, 3 cồng nha kơlôi sơnơng ngui khoa học công nghệ bơh gah lơh sơnơm dê drơng broă lơh rơcang sơndră kòp Covid-19 tàm tơngai pa do. Tàm hơ̆, kơlôi sơnơng lơh gơlik bộ kít kham đal git, khít kháng thể lam Việt Nam gơ gơs là 1 tàm 5 lơgar lơh gơlik gơtùi bơta kít do. Broă lơh xét nghiệm RT-PCR bơh sơn rờp ai cồng nha niam, gơtùi gờñ ai ngui tàm tơngai tus.

Tus tŭ do, gùt lơgar geh 2 mpồl lơh gơlik gam kơlôi sơnơng sơnơm vaccine rơcang sơndră kòp Covid-19 là sơnơm vaccine Nanocovax bơh Kong ti Cổ phần Công nghệ sinh học sơnơm tơmba Nanogen dê mờ sơnơm vaccine COVIVAC bơh Viện sơnơm vaccine mờ sinh phẩm Nha trang dê. Đơs tàm dơ̆ lơh broă, Thủ tướng Phạm Minh Chính pà git, broă ngui sơnơm vaccine rơcang sơndră kòp Covid-19 ờ di là ƀuơn, ngan là tàm tŭ tơngai kòp bơtờp uă tàm dunia, pràn jak lơh gơlik sơnơm vaccine den mìng geh dùl khà lơi hơ̆ lơm. Thủ tướng sồr ală kuang bàng cribơyai, đơs lài jơnau digơlan, bơta pràn, jơnau sồr, kơnòl broă tàm broă lơh gơlik, prap gàr, bơyai lơh cit sơnơm vaccine bè lơi gơ in geh cồng nha.

Cau mblàng K’Duẩn