VOV4.K’ho- Pơn jat tai dơ\ lòt còp ngan ngồn lơgar New Zealand, tàm dư\ cri bơyai broă geh lơh ngai òr (13/3) jat jơ lơgar Việt Nam dê, Thủ tướng Nguyễn Xuân Phúc mờ mò Jacinda Ardern, Thủ tướng lơgar New Zealand neh dùl nùs bal đơs là geh dong kờl lơh broă bal đah 2 lơgar wèt tus tam klac lơh broă bal jo\ jòng kuơmàng.

Bàr nă Thủ tướng dùl nùs ring bal dong kờl lam lơh Broă lơh broă đah 2 lơgar bơh nam 2017 tus nam 2020 kung bè lơh uă gùng dà broă lơh kă bro, lơh ngai ai priă geh bơh kă bro đah 2 lơgar geh 2 tơmàn đôlar Mỹ tàm nam 2020.

Thủ tướng Nguyễn Xuân Phúc sồr lơgar New Zealand pơn jat tai lơh geh tơl ală bơta niam ai ală bơta phan kă bro plai chi bơkào lơgar Việt Nam dê tăc tàm lơgar New Zealand, mờ kung hòi jà ală mpồl lơh sa kă bro lơgar do sơlơ bơcri tai priă jền tàm lơgar Việt Nam. Tơnơ\ dơ\ cribơyai broă, bàr gah neh geh Jơnau yal bơr bal bè dong kờl gi\t gơp tam klac lơh broă bal jo\ jòng kuơmàng tơl mờ ală bơta đah Việt Nam mờ  New Zealand.

Cau mblàng Lơ Mu K’Yến- Cau yal tơngi\t K’Hạnh