VOV4.K’ho – Kung tàm ngai òr (01/3), Thủ tướng Chính phủ, ồng Nguyễn Xuân Phúc neh tìp mat cribơyai broă mờ Kuang atbồ Đảng Lao động Triều Tiên, Chủ tịch lơgar Triều Tiên, ồng Kim Jong-un. Thủ tướng Nguyễn Xuân Phúc đơs tờm Đảng, Dà lơgar Việt Nam sùm sền dờng màng mờ kơp kờ` bơt bơtàu, bơtàu tơnguh git gơp lơh bơyô ờs mờng mờ Đảng, Dà lơgar mờ làng bol lơgar Triều Tiên; Việt Nam kờ` dong kờl Triều Tiên bơtàu tơnguh lơh sa, tam gơl niam rài kis làng bol; Chính phủ mờ làng bol Việt Nam tu\ lơi kung kờ` bal mờ Chính phủ, làng bol lơgar Triều Tiên kơlôi sơnơng lơh pràn tam klac geh kuơ bal tàm ală gah tài bơta kuơ bơh làng bol 2 lơgar dê.

Bè ală bơta tàm bồt Triều Tiên, Thủ tướng Chính phủ Nguyễn Xuân Phúc đơs tờm là bơyô rềp mềl mờ jơh nùs bơh làng bol lơgar Triều Tiên dê, Việt Nam ờ tam gơl nùs nhơm kờ` dùl bồt Triều Tiên ring lơngai, kơ\ kơljap, lơh broă bal mờ bơtàu tơnguh; jờng rơ ală broă lơh ngan bơh lơgar Triều Tiên mờ Mỹ dê tàm dơ\ tìp mat kuang bàng dờng màng dơ\ 2, ai go\ bơta kơp kờ`, ală gah geh pơn jat tai lơh pràn broă cribơyai bal, bơsong ring lơngai ală bơta geh gơ rềng; đơs tờm, tàm bơta pràn he dê, Việt Nam neh mờ geh pơn jat tai dong kờl, tă pơgồp jơh nùs tàm broă lơh hơ\.