VOV4.K’ho – Drim òr (24/7), tàm Hà Nội, Thủ tướng Chính phủ Nguyễn Xuân Phúc wă Chủ tịch Hạ viện Australia, ồng Tony Smith gam ơm còp Việt Nam jat jơnau jà bơh Chủ tịch Quốc hội, mò Nguyễn Thị Kim Ngân dê. Đơs niam dơ\ tus còp bơh ồng Tony Smith mờ Mpồl kuang bàng Hạ viện Australia dê, Thủ tướng pin dờn, dơ\ tus còp geh lơh geh cồng nha niam, pơgồp bơnah bơtàu tơnguh git gơp lơh broă bal kuơ màng Việt Nam – Australia đơs bal mờ đah Quốc hội 2 lơgar đơs is.

Thủ tướng kơp kờ`, tàm tơngai tus, 2 lơgar pal pơn jat tai sơlơ lơh broă bal, ngan là tàm ală gah mờ 2 lơgar geh uă bơta pràn bè lơh sa, kă bro, bơcri priă, sền gàr ngap lơngai, sền gàr dà lơgar, bơto bơtê mờ bơsram, khoa học công nghệ, lơh sa suơn sre ngui công nghệ cao, dong kờl bơtàu tơnguh… Thủ tướng đơs tờm, Quốc hội mờ Chính phủ Việt Nam đơs niam mờ kơp kờ` Australia pơn jat tai geh jơnau đơs pràn kơldang, kờ` gùng dà broă lơh bơh ASEAN mờ Việt Nam dê tàm bơta dà lềng đah mattơngai lik.