VOV4.K’ho - Đơng lam mờ geh jơnau đơs tàm pơrjum pờ tơlĭk tàm internet mờ Mpồl đơng lam dà lơgar bal mờ 63 càr, ƀòn dờng bè rơcang sơndră mờ kòp Covid-19 geh bơyai lơh ngai òr (07/05) tàm hìu lơh broă Chính phủ, Thủ tướng ồng Phạm Minh Chính đơs tờm, ờ gơtùi lời geh bơta dùl nă cau ờ gĭt kơlôi sơnơng tàm broă sơndră mờ kòp lơh gùt mpồl bơtiàn pal glar bòl.

Bơh broă jòi mờ mblàng bơta gơtờp kòp, Mpồl đơng lam dà lơgar neh gĭt nền tiah kòp tàm càr Hà Nam gơrềng tus mờ cau kòp sồ 2899, tiah kòp càr Yên Bái, Vĩnh Phúc gơrềng tus mờ mpồl cau jăk chài lơgar Ấn Độ mờ lơgar Lo, tiah kòp tàm hìu sơnơm K gơtờp bơh tiah gơtìp kòp hìu sơnơm Kòp Nhiệt đới Dà lơgar. Mơya tiah kòp tàm hìu sơnơm Kòp Nhiệt đới Dà lơgar bal mờ ờ uă cau gơtìp kòp tàm ƀòn dờng Đà Nẵng, càr Hải Dương ờ gĭt loh bơta gơtờp. Bơta do pà gŏ, tàm mpồl bơtiàn neh geh kòp. Bơh tiah kòp tàm hìu sơnơm K mờ hìu sơnơm Kòp Nhiệt đới Dà lơgar, Bộ trưởng Bộ Y tế ồng Nguyễn Thanh Long đơs, ală hìu sơnơm pal pờ ơnàng broă sền gròi kòp tàm ală tiah di gơlan gơtìp uă bè khoa kham kòp, sơm kòp mhar, leh lơh is. Cau kòp bal mờ cau lơh sơnơm pal geh ai phan nàng sền mờ jăt tơngai nàng geh xét nghiệm, gờñ gŏ ală cau gơtìp mờ kòp.

Đơs tàm pơrjum, Thủ tướng ồng Phạm Minh Chính sồr lơh wơl broă ờ sền gròi, sền ờ sơ̆p tàm broă sơndră mờ kòp. Thủ tướng kung đơs tờm, ală càr, ƀòn dờng tŭ kòp gơtìp, bañ ngòt ir, pal ngăc ngar, sền di bơta kòp nàng bañ ai tơlĭk ală broă lơh geh kuơ ir, lơh aniai tus mờ bơta ring lơngai mpồl bơtiàn mờ broă tơnguh bơtàu lơh sa.

Cau mblàng Ndong Brawl