VOV4.K’ho - Mang ngai 24 nhai 3, Thủ tướng ồng Nguyễn Xuân Phúc neh geh dơ̆ cri bơyai tàm điện thoại mờ kuang atbồ lơgar Chile ồng Sebastian Piñera nàng cri bơyai ală gùng dà broă lơh bal mờ broă lơh mùl màl kờñ tơnguh broă lơh bal tơl ală bơta đah lơgar Việt Nam mờ lơgar Chile.

                    Thủ tướng ồng Nguyễn Xuân Phúc cri bơyai tàm điện thoại mờ kuang atbồ lơgar Chile

Thủ tướng ồng Nguyễn Xuân Phúc đơs niam broă lơh gĭt gơ̆p, lơh bơyô bal đah lơgar Việt Nam mờ lơgar Chile neh geh ală broă tơnguh bơtàu pràn kơl dang tơnơ̆ 50 nam mờ đơs, lơgar Việt Nam kơ̆p kờñ geh pơn jăt tai lơh niam rơlao tai broă lơh gĭt gơ̆p, lơh bơyô bal bơh bàr lơgar, tàm hơ̆ uă ngan là broă lơh sa, kă bro mờ bơcri priă. Kuang atbồ lơgar Chile ồng Sebastian Piñera tơlĭk nùs nhơm mờ đơs sơl, lơgar Chile sền kuơ broă lơh gĭt gơ̆p bal ờs mờng mờ lơgar Việt Nam, đơs niam ală broă lơh ngan pa do bơh Chính phủ lơgar Việt Nam dê tàm broă rơcang sơndră mờ kòp Covid-19 mờ geh sùm broă gơguh lơh sa.

Bàr kuang đơng lam neh ring bal geh ờ uă ală broă tơnguh broă lơh gĭt gơ̆p, bơh bơyô bal ờs mờng mờ lơh broă bal tơl ală bơta bơh bàr lơgar tàm tơngai tus, tàm hơ̆ geh bal broă geh sùm broă tam gơl mpồl kuang bàng dờng màng, lơh geh cồng nha mờ sùm geh ală cơ chế lơh broă bal, pơgồp bal chồl pràn ală broă lơh sa kă bro uă gah mờ pơgồp bal tiah tàm bơta broă lơh sa mờ kă bro gùt plai ù gam gơtìp pràn ngan bơh kòp Covid-19.

Cau mblàng Ndong Brawl