VOV4.K’ho - Ngai òr (17/05), tàm hìu lơh broă Chính phủ, Thủ tướng Chính phủ ồng Phạm Minh Chính neh geh dơ̆ cri bơyai tàm điện thoại mờ Thủ tướng lơgar Nhờk ồng Yoshihide Suga.

 Thủ tướng ồng Phạm Minh Chính cri bơyai tàm điện thoại mờ Thủ tướng lơgar Nhờk

Tàm nùs nhơm gĭt gơ̆p, pin dờn bal mờ lơh broă bal, bàr Thủ tướng đơs niam broă lơh gĭt gơ̆p đah lơgar Việt Nam mờ lơgar Nhờk neh mờ gam tơnguh bơtàu niam bơnĕ ngan, mờ cri bơyai ală broă lơh mùl màl chồl pràn broă lơh bal jŏ jòng jrô ơnàng đah lơgar Việt Nam mờ lơgar Nhờk tàm tơngai tus.

Bàr Thủ tướng ring bal tơnguh broă cri bơyai jŏ jòng bơh ală bộ, gah lơh broă, ală càr, ƀòn dờng, pơgồp bal nền nòn nàng bơsong ală broă gơlĭk geh tàm broă lơh gĭt gơ̆p bal đah bàr lơgar; bơyai lơh ală broă tơnkah 50 nam crơng gơs broă lơh gĭt gơ̆p, lơh broă bal đah lơgar Việt Nam mờ lơgar Nhờk tàm nam 2023 di pal mờ broă lơh gĭt gơ̆p, lơh broă bal bơh bàr lơgar. Bàr kuang đơng lam kung cri bơyai bè ală broă tàm tiah do mờ tàm dunia geh sền gròi bal, tàm hơ̆ geh broă tàm dà lềng đah măt tơngai lĭk; ring bal pơn jăt tai lơh broă bal nền nòn tàm ală dơ̆ pơrjum uă lơgar, tàm hơ̆ uă ngan là tàm Liên hợp quốc, mpồl ASEAN.

Cau mblàng Ndong Brawl