VOV4.K’ho - Mho òr (24/10), Thủ tướng ồng Phạm Minh Chính đơng lam dơ̆ pơrjum bơh Thường trực Chính phủ ai pơgồp jơnau đơs bè Rơcang cih broă lơh brồ guh mờ tơnguh bơtàu broă lơh sa mpồl bơtiàn. Thủ tướng sồr broă lơh pal geh tơl ơnàng, broă lơh tơl dờng, tơl tơngai jŏ, tàm tơngu me di pal mờ Nghị quyết Pơrjum dờng dơ̆ 13 Đảng neh ai, di pal mờ rơndăp broă tơnguh bơtàu lơh sa mpồl bơtiàn 5 nam bơh nam 2021 tus 2025 mờ broă tơnguh bơtàu lơh sa mpồl bơtiàn nam 2022.

Thủ tướng sồr là pal sền sơwì, yal lài bơta pal di, di pal mờ mùl màl, loh làng, song dơ pă, apl geh ai bơh khà kờp geh bơta pin dờn uă. Broă lơh pal tơrgùm broă lơh tờm, geh kuơ tàm ờ uă broă jăt mờ gùng dà broă lơh: ală kơnòl broă lơh bè lơh sơnơm, tàm hơ̆ uă ngan là tơnguh uă bơta pràn lơh sơnơm đơs bal, tàm hơ̆ kuơ màng ngan là sền gròi broă lơh sơnơm rơcang lài, lơh sơnơm tàm ală tiah, sơnơm vaccine mờ ală broă sơm kòp; ală broă bè rài kis lơh sa mpồl bơtiàn, broă dong kờl, brồ guh mpồl lơh sa kă bro, hợp tác xã; gàr ring niam broă lơh dờng, sền gròi gơmù khà priă... Thủ tướng sồr Anih lơh broă đơng lam pal iăt ală jơnau mờ kuang bàng đơs mờ pơn jăt tai sền gròi jơnau đơs bơh ală anih lơh broă geh gơnoar bè Rơndăp cih Broă lơh brồ guh mờ tơnguh bơtàu broă lơh sa mpồl bơtiàn, mhar yal mờ ală cấp geh gơnoar gờñ ngan di lah gơtùi, tàm hơ̆ pal kah ngan tus mờ cồng nha, di pal, ai geh broă ring bal uă.

Cau mblàng Ndong Brawl