VOV4.K’ho - Drim òr (28/09), Thủ tướng Chính phủ ồng Phạm Minh Chính neh đơng lam pơrjum pờ tơlik tàm internet gùt lơgar Chính phủ mờ ală bộ, gah lơh broă, anih lơh broă Dà lơgar bal mờ ală càr, ƀòn dờng tàm gùt lơgar bè broă chồl pràn broă bơcri priă dà lơgar.

Thủ tướng ồng Phạm Minh Chính đơng lam pơrjum gùt lơgar bè broă chồl pràn broă bơcri priă dà lơgar

Jăt jơnau yal, rơndăp broă bơcri priă Dà lơgar nam 2021 geh Thủ tướng Chính phủ jào dùl dơ̆ ai ală bộ, anih lơh broă dà lơgar mờ ală càr, ƀòn dờng in bơh lồi nam 2020 mờ kờp jơh khà priă là 461 rơbô 300 tơmàn đong. Tus tŭ do, neh tam pà, jào nền nòn ai ală rơndăp broă lơh geh mờr 88%. Đơs tàm pơrjum, Thủ tướng ồng Phạm Minh Chính pà git: pơrjum do kờñ sền wơl cồng nha, mblàng ală broă neh lơh geh, ờ hềt lơh geh; mblàng bơta tờm, tàm hơ̆ uă ngan là bơta tờm bơh să tờm dê; bơh tŭ hơ̆ geh ai tơlik jơnau kờñ, broă chồl pràn bơcri priă dà lơgar tàm tơngai tus. Thủ tướng sồr ală kuang bàng tơrgùm bơta ngăc ngar, cri bơyai nàng chồl pràn broă bơcri priă, ngui geh cồng nha khà priă dà lơgar, pơgồp bal tàm broă tơnguh bơtàu lơh sa mpồl bơtiàn nam 2021 mờ ai geh bơnàng jă tàm broă tơnguh bơtàu lơh sa mpồl bơtiàn nam 2022 in.

Cau mblàng Ndong Brawl