VOV4.K’ho- Thủ tướng ồng Phạm Minh Chính pa đơng lam dơ̆ pơrjum Thường trực Chính phủ bè broă bơyai lơh tĕ khà kuang bàng Quốc hội khoă 15 mờ kuang bàng Hội đồng Nhân dân ală cấp tơngai bơh nam 2021 tus 2026 tàm bơta kòp Covid-19 gơtìp kal ke.

Thủ tướng ồng Phạm Minh Chính đơng lam dơ̆ pơrjum Thường trực Chính phủ bè broă bơyai lơh tĕ khà

Ală jơnau đơs tàm pơrjum ndrờm ring bal pal geh gùng dà broă lơh mùl màl tus mờ tơl càr, ƀòn dờng neh lời gơtìp mờ kòp Covid-19 lài mờ tŭ tĕ khà, tàm dơ̆ tĕ khà mờ tơnơ̆ mờ dơ̆ tĕ khà. Bộ Y tế neh tơlĭk rơndăp broă bè broă lơh sơnơm drơng tĕ khà, tơrgùm 3 tơngu me tờm: Kloh niam tiah kis mờ niam ờ do ờ dă kòp Covid-19; niam ờ do ờ dă phan sa; broă sơm kòp mờ ờ uă broă lơh kuơ màng ndai. Bộ Y tế neh bơyai lơh bơsram tàp ai ală hìu sơnơm bơh kơnhoàl tus mờ càr, mờ sồr ală càr tơnguh broă sền gròi.

Tơnơ̆ mờ dơ̆ pơrjum do, Bộ Y tế geh pơgồp bal mờ Bộ Nội vụ nàng geh jơnau bơto sồr nền nòn, tàm hơ̆ uă ngan là gùng dà broă lơh gơwèt mờ càr, ƀòn dờng gơtìp kòp, cau kòp gam sơm kòp. Ală jơnau đơs tàm pơrjum kung geh ai, pal bơyai lơh tĕ khà jăt jơ, gàr bơta ngài, pơn chèo glòm muh măt mờ anih kloh niam. Thùng ơn sră tàm tiah gơtìp kòp pal geh lơh kloh vi khuẩn lài mờ tŭ bơyai lơh sền sră. Dờp ală jơnau đơs, jơnau đơs pơn dŭt pơrjum, Thủ tướng ồng Phạm Minh Chính đơs tờm tus mờ broă sền gròi nền nòn gơnoar jăt mờ kơrnoăt nàng bơyai lơh niam dơ̆ tĕ khà.

Cau mblàng Ndong Brawl