VOV4.K’ho- Thủ tướng Chính phủ ồng Phạm Minh Chính pa geh dơ̆ pơrjum pờ tơlik tàm internet mờ mò Aurélia Nguyen, Kuang atbồ đơng lam Broă lơh COVAX.Tàm dơ̆ pơrjum, Thủ tướng pơn jờng mờ đơs niam gơnoar bơh COVAX tàm broă jòi anih nàng ai, đơng lam, tam pà ndrờm bal sơnơm vaccine rơcang sơndră mờ kòp Covid-19 tàm gùt plai ù, pơgồp bal kuơ màng tàm broă lơh ngan bal nàng sền gròi kòp gơtờp.

Cri bơyai mờ mò Aurélia Nguyen, Thủ tướng đơs gùng dà broă lơh bơh lơgar Việt Nam dê là ai bơta pràn kơl dang să jan mờ ờ do ờ dă bơh làng bol rơlao jơh mờ lài jơh; Lơgar Việt Nam gam lơh ngan cih sơnơm vaccine tơrgùm jơh gùt làng bol mhar ngan, gờñ ngan di lah gơtùi. Thủ tướng hòi jà COVAX ai lài broă tam pà sơnơm vaccine lơgar Việt Nam in sơlơ mhar sơlơ niam, sơlơ uă sơlơ niam, tàm hơ̆ uă ngan là tàm ală nhai 9, 10 mờ 11; lơh gơs jơnau ring bal ai sơnơm vaccine lơgar Việt Nam in tàm nam 2021. Thủ tướng kung hòi jà COVAX tam pà, ai sơnơm vaccine Moderna nàng lơgar Việt Nam cit ding dơ̆ 2 ai làng bol in.

Cau mblàng Ndong Brawl