VOV4.K’ho - Kung tàm dơ̆ tus pơrjum COP26, tàm lơgar Anh, Thủ tướng ồng Phạm Minh Chính neh geh dơ̆ lơh broă mờ kuang đơng lam Tập đoàn AstraZeneca mờ sền dơ̆ kĭ mờ yal ală jơnau ring bal lơh broă bal đah AstraZeneca mờ lơgar Việt Nam.

       Thủ tướng ồng Phạm Minh Chính sền dơ̆ kĭ yal jơnau ring bal đah AstraZeneca mờ lơgar Việt Nam

AstraZeneca geh bơcri 2 rơbô tơmàn đong (ndrờm mờ 90 tơlăk dolar Mỹ) nàng dong kờl lơgar Việt Nam tơnguh pràn broă lơh sơnơm tàm lơgar, dong kờl cau kòp geh tơl niam rơlao mờ ală bơta sơnơm geh bơta niam uă geh lơh tơn tàm lơgar Việt Nam.

Đơs tàm dơ̆ lơh broă, Thủ tướng ồng Phạm Minh Chính ưn ngài AstraZeneca neh ai di tŭ sơnơm vaccine lơgar Việt Nam in tàm tơngai do, kơnờm mờ hơ̆, den tàng neh pơgồp bal kuơ màng tàm broă gròi sền kòp Covid-19; pơgồp bal tàm broă sền gàr bơta pràn kơl dang să jan ai làng bol in. Thủ tướng kơ̆p kờñ AstraZeneca gờñ jào khà sơnơm vaccine gam tai bè neh hơ ai lơgar Việt Nam in di mờ tơngai; mờ đơs lơgar Việt Nam kơ̆p kờñ lơh broă bal jŏ jòng mờ AstraZeneca, gàr niam bơta geh tơl sơnơm tàm bơta dunia gam ờ niam tài tam gơl trồ tiah mờ kòp gơtờp.

Cau mblàng Ndong Brawl