VOV4.K’ho - Drim òr (26/08), Thủ tướng ồng Phạm Minh Chính neh tus sền gròi ală hìu tam cah is tàm xã, sơnah ƀòn ai cau F0 mờ F1 tàm ƀòn dờng Thủ Đức, ƀòn dờng Hồ CHí Minh dê.

Thủ tướng neh tus còp anih lơh broă sa mpồl bơtiàn jal mhar geh lơh tàm hìu chài rơgơi sơnah ƀòn Cát Lái. Jăt ồng Nguyễn Minh Điền, Bí thư sơnah ƀòn Cát Lái yal, sơnah ƀòn geh 47 mpồl ƀòn, rơlao 6 rơbô hìu nhă. Tơnguh rơlao 400 nă cau drơng tàm broă gàr tơl phan sa, lòt drà cau ndai in. Ală hìu ndrờm mờ rơƀah neh dong kờl 3 dơ̆, tơl dơ̆ 1 tơlăk 500 rơbô đong. Tŭ do sơnah ƀòn gam 2 tiah pơrhê. Tơnơ̆ mờ tŭ iăt jơnau yal tàm sơnah ƀòn Cát Lái, Thủ tướng sồr tàm tơngai tus ƀòn dờng lơh jăt broă tam cah ngài pal lơh ngan ai tơngai niam nàng xét nghiệm rơwah cau F0, bơdìh hơ̆ tai, pal gàr niam rài kis broă lơh sa mpồl bơtiàn. Làng bol pal geh tìp mờ broă lơh sơnơm gờñ ngan. Thủ tướng đơs tờm, pal crơng gơs mơ anih đơng lam, hìu sơnơm ntrờm, ờ mìng kòp Covid mờ gam geh kòp ndai tai. Thủ tướng neh sền kơl dung rài kis broă lơh sa geh phan sa, sơnơm, geh pà làng bol 3 ngai 1 dơ̆. Thủ tướng sồr sơnah ƀòn pal rơcang ai làng bol in ờ mìng 1 poh mờ jŏ rơlao nàng gàr geh tơl niam phan sa geh kuơ tŭ lơh jăt broă tam cah is.

Cau mblàng Ndong Brawl