VOV4.K’ho - Mho òr (02/11), jăt jơ tàm tiah do dê, tàm broă pơrjum dơ̆ 26 ală gah tus bal Công ước bơh Liên hợp quốc dê bè tam gơl trồ tiah (COP26) bơyai lơh tàm lơgar Anh, Thủ tướng ồng Phạm Minh Chính tus pơrjum bal mờ geh jơnau đơs tàm pơrjum yal jơnau hơ tơmù tơlik nhơm metan gùt plai ù geh Kuang atbồ lơgar Mỹ ồng Joe Biden mờ Chủ tịch Ủy ban châu Âu đơng lam bal.

Đơs tàm dơ̆ yal jơnau do, Thủ tướng Chính phủ ồng Phạm Minh Chính tơlik nùs nhơm ưn ngài mờ đơs niam Mpồl bơyai lơh, Kuang atbồ lơgar Mỹ mờ Chủ tịch Ủy ban châu Âu neh jà tus bal bơceh lơh jơnau hơ tơmù tơlik nhơm metan. Tàm pơrjum kuơ màng do, Thủ tướng ồng Phạm Minh Chính pơyoa 2 jơnau. Thủ tướng hòi jà jơh ală he pal tam klăc bal, ring bal, tus bal kơrian, lơh gơmù broă gơguh bơh nhơm tơlik metan. Thủ tướng đơs, do là broă gùt plai ù den tàng pal geh broă lơh bal bơh gùt plai ù dê, là broă gơrềng tus mờ ală làng bol den tàng bal geh broă lam sồr tus mờ gùt làng bol.

Cau mblàng Ndong Brawl