VOV4.K’ho- Jat jơnau sồr bơh đah lơgar Chile dê, Thủ tướng Chính phủ ồng Phạm Minh Chính neh geh dơ̆ cribơyai tàm điện thoại mờ Kuang atbồ lơgar Chile nàng cribơyai bè git gơp đah Việt Nam mờ Chile kung bè lơh broă bal đah 2 lơgar sơndră mờ tam gơl trồ tiah, pơgồp bơnah tàm cồng nha bơh pơrjum dờng màng Liên hợp quốc dê bè tam gơl trồ tiah dơ̆ 26 (COP26) mờr tus.

          Thủ tướng Chính phủ ồng Phạm Minh Chính cribơyai tàm điện thoại mờ Kuang atbồ lơgar Chile

Tàm dơ̆ cribơyai tàm điện thoại, 2 nă kuang đơng lam bồ đơs niam bơta bơtàu tơnguh niam ngan bơh git gơp lơh broă bal 2 lơgar dê, kuơmàng là broă priă lơh geh bơh kă bro đah 2 lơgar tàm 9 nhai bồ nam 2021 geh 1 tơmàn 470 tơlak dolar Mỹ, gơguh 59% pơndrờm bal dùl tŭ nam lài.

Bàr gah ring bal 2, 3 broă lơh sơlơ tơnguh git gơp lơh broă bal tơl làm đah 2 lơgar tàm tơngai tus. 2 gah ring bal gàr sùm pơgồp bal jơh nùs mờ tàm dong kờl bal mờ gơp tàm ală mpồl lơh broă dunia mờ cribơyai uă lơgar, pơgồp bơnah sơlơ tơnguh git gơp đah ASEAN mờ Mpồl tam klac Thái Bình Dương, tă pơgồp tàm ring lơngai, kơ̆ kơljap, lơh broă bal mờ bơtàu tơnguh tàm 2 tiah.

Cau mblàng K’Duẩn