VOV4.K’ho- Thủ tướng Chính phủ ồng Phạm Minh Chính pa geh dơ̆ lơh broă mờ Ủy ban Nhân dân càr Bình Dương bè broă lơh rơcang sơndră kòp Covid-19 mờ bơtàu tơnguh lơh sa- mpồl bơtiàn. Tơnơ̆ tŭ iat càr Bình Dương yal bè broă lơh rơcang sơndră kòp mờ broă lơh sa mpồl bơtiàn mờ jơnau đơs bơh ală Bộ, gah broă lơh dê, Thủ tướng đơs niam cồng nha rơcang sơndră kòp mờ bơtàu tơnguh lơh sa- mpồl bơtiàn tàm Bình Dương. Kòp bơtờp kung gam gơtùi sền gròi, gơguh lơh sa rlau 7%, tă dia rlau 60%, rài kis làng bol ờ hềt gơtìp gơ rềng uă, broă lơh gàr tơl niam rài kis mpồl bơtiàn geh gàr sùm lam lơh niam. Do là ală bơta niam bơh càr Bình Dương dê tàm 6 nhai bồ nam, pal tơnguh niam, pơn jat tai ai geh mờng chài.

Đơs lài broă gơlik geh mờr tus digơlan gam kal ke, ờ gơtùi sền gròi broă gơlik geh tài ală cau F0 ờ git loh bơh lơi bơtờp kòp. Dilah ờ gơtùi sền gròi kòp den lơh gơ rềng tus jơh broă lơh jat kơnòl broă chính trị bơh tŭ do tus lồi nam, ngan là bơtàu tơnguh lơh sa- mpồl bơtiàn. Den tàng, pal sền gròi broă gơlik geh, bơt bơtàu jơnau rơcang lài, broă lơh dipal, gơtùi lam lơh ngan ngồn, geh cồng nha.

Cau mblàng K’Duẩn