VOV4.K’ho- Mho ngai 22/12, Thủ tướng Cíñ phủ ồng Phạm Minh Chính mờ mpồl kuang bàng bơh Cíñ phủ dê neh lơh broă mờ kuang đơng lam bồ tờm ngan càr Quảng Bình. Tơnơ̆ tŭ iat ală jơnau đơs bơh ală Ƀộ, gah broă lơh dà lơgar mờ kuang đơng lam bồ tờm ngan càr Quảng Bình dê, Thủ tướng Phạm Minh Chính jờng rơ ală cồng nha mờ càr Quảng Bình neh lơh geh tàm tơngai lài. Thủ tướng đơs nền, nam 2021, bulah gơtìp uă kal ke, bơta lòng, mơya Đảng ƀộ, gơnoar atbồ mờ làng bol càr Quảng Bình neh lơh ngan, lơh geh ală cồng nha niam ngan.

Thủ tướng đơs loh, nam 2022 kung là nam kuơmàng ngan nàng lơh jat Nghị quyết pơrjum dờng dơ̆ 13 mờ pơrjum dờng Đảng ală kấp. Jơnau kờñ là pal bơtàu tơnguh kơ̆ kơljap, bơtàu tơnguh jơh bal bè khà mờ bơta niam, tơnguh niam rài kis nùs nhơm mờ phan bơna bơh làng bol dê, pal gàr kơ̆ kơljap cíñ trị, sền gàr lơngap lơngai, sền gàr dà lơgar mờ jat tàm bơta pràn krơi is. Thủ tướng sồr Quảng Bình gròi sền kòp bơtờp geh cồng nha, mhar lơh gơs jơnau kờñ cit sơnơm vaccine ding dơ̆ 2 ai cau bơh 18 sơnam in tàm nhai 12 do, lơh gơs broă cit sơnơm vaccine ding dơ̆ 3 tàm quý 1 nam 2022.

Cau mblàng K’Duẩn