VOV4.K’ho- Pơn jat tai dơ̆ lòt còp ngan ngồn lơgar Tây, ngai 05/11, Thủ tướng Phạm Minh Chính mờ Mpồl kuang bàng dờng màng Việt Nam neh lòt còp, lơh broă mờ Viện Pasteur Paris. Kuang đơng lam bồ Viện Pasteur Paris pà git, tàm khà ală lơgar geh git gơp mờ Viện, den Việt Nam geh gơnoar broă kuơmàng ngan. Đơs tàm dơ̆ lơh broă, Thủ tướng đơs nền, do là anih mờ Mpồl kuang bàng Việt Nam sền gŏ pal tus tàm dơ̆ lơh broă do, pơn jat tai gàr kơ̆ git gơp lơh broă bal mờ Viện Pasteur. Ală Viện Pasteur là dùl bơnah rơndap tap sèng gơs bơta gơ rềng đah Việt Nam mờ Tây. Tàm dunia, ờ huan geh lơgar lơi geh tus 3 Viện Pasteur bè Việt Nam, geh lơh tàm 3 tiah: đah tô, đah tàm gùl mờ đah jum dà lơgar, ai gŏ broă wèt sền jŏ jòng bơh ală cau lòt lài dê.

Kung tàm ngai 05/11, Thủ tướng Phạm Minh Chính neh lòt còp Hìu lơh broă Mpồl bơto bơsram, khoa học mờ niam chài bơh Liên hợp quốc dê (UNESCO) lơh tàm Paris, lơgar Tây mờ tìp mat cribơyai broă mờ mò Audrey Azoulay, Kuang atbồ dờng mpồl UNESCO. Mho mang ngai 05/11, Thủ tướng Phạm Minh Chính neh lik rê bơh Paris, tơn jơh niam bơnĕ jơh broă lơh còp ngan ngồn lơgar Tây.

Cau mblàng K’Duẩn