VOV4.K’ho- Mho ngai 01/12, Thủ tướng Phạm Minh Chính đơng lam dơ̆ lơh broă pờ tơn tàm internet đah Thường trực Chính phủ mờ kuang đơng lam bồ tờm ngan ƀòn dờng Đà Nẵng bè broă bơtàu tơnguh lơh sa- mpồl bơtiàn. Thủ tướng Phạm Minh Chính cih dờp, đơs niam, jờng rơ broă lơh ngan bơh ală kuang đơng lam bồ, kấp ủy đảng, gơnoar atbồ, ling klàng mờ làng bol ƀòn dờng Đà Nẵng dê tàm broă rơcang sơndră kòp Covid-19 mờ bơtàu tơnguh lơh sa- mpồl bơtiàn tàm tơngai lài.

Bơdìh hơ̆ tai, Thủ tướng neh đơs tus ală bơta ờ niam bè rơndap tap sèng mờ bơta chài bơtàu tơnguh bơh rài lơh sa dê, bơta bơtàu tơnguh lơh sa ờ hềt dipal mờ bơta ƀuơn, bơta pràn mờ bơta sền gròi bơh Đảng, dà lơgar dê. Tàm tơngai tus, Thủ tướng sồr ƀòn dờng Đà Nẵng pal tơnguh nùs nhơm tam klac bal, brồ guh is, lơh gơlik bơh ờ gơs geh, tam gơl bơta kal ke gơs bơta ƀuơn, tam gơl pa, bơceh pa, bơsong kal ke nàng brồ guh. Mờ kung sồr ală Bộ, gah broă lơh gơ wèt kơnòl broă he dê tơrgùm tă bơsong kal ke, kòl yan lơh gơlik bơta ƀuơn nàng Đà Nẵng in bơtàu tơnguh.

Cau mblàng K’Duẩn