VOV4.K’ho- Drim ngai 21/12, Ƀộ Tư pháp bơyai lơh pơrjum gùt lơgar lam lơh broă lơh sền gàr adat boh lam nam 2022 jat broă lơh pờ tơlik tơn tàm internet tàm 63 anih pờ tơlik tơn tàm ală càr, ƀòn dờng. Tus bal mờ đơs tàm pơrjum, Thủ tướng Cíñ phủ ồng Phạm Minh Chính ala mat Đảng, dà lơgar, đơs niam ală broă lơh ngan, bơta geh kơnòl bơh jơh gùt gah sền gàr adat boh lam, mpồl lơh broă kơrnuat boh lam ală ƀộ, gah broă lơh, anih lơh broă sền gàr adat boh lam kấp hơ đơm dê neh lơh geh uă cồng nha kuơmàng.

Tàm tơngai tus, Thủ tướng sồr pal tơrgùm bơta pràn lam lơh 6 kơnòl broă tờm tàm nam 2022. Tàm hơ̆ đơs nền tơnguh jơnau git wă bè gơnoar broă, bơta kuơ bơh broă lơh bơt bơtàu mờ lơh jat adat boh lam dê; lơh jat gùng dà, broă lơh bơh Đảng, jat bơta geh ngan nàng mhar lam lơh jat ngan ngồn ală thể cế, kơrnuat boh lam, adat boh lam gơtùi lam lơh ngan ngồn, geh cồng nha, tă bơsong kal ke, kòl yan bè thể cế.

Cau mblàng K’Duẩn