VOV4.K’ho- Di dơ̆ Pơrjum pờ tơn tàm internet kuang bàng dờng màng tiah đah mat tơngai lik châu Á (EAS) dơ̆ 16, mho ngai 27/10, Thủ tướng Chính phủ ồng Phạm Minh Chính neh geh dơ̆ tìp mat lùp còp ală Đại sứ, kuang ala mat ală lơgar tus bal EAS tàm Hà Nội, lài mờ tŭ tus bal Pơrjum bơh anih pờ tơlik tơn tàm Hà Nội.

Đơs tàm dơ̆ wă, Thủ tướng Phạm Minh Chính đơs nền wơl, Việt Nam kơ̆ dơn jat broă lơh lơh broă mờ lơgar ndai krơi is, lơh tờm is, li la broă lơh bal, git gơp mờ uă lơgar; rơcang lài, jơh nùs mut gơ rờm bal dunia tơl làm, jrô ơnàng; là bơyô, là lơgar lơh broă bal pin dờn mờ là lơgar geh jơng jơh nùs, geh kơnòl tàm mpồl bơtiàn dunia. Bơh nùs nhơm hơ̆, Việt Nam sùm sền dờng màng tơnguh git gơp lơh bơyô, lơh broă bal niam bơnĕ mờ ală lơgar, at tê bal gàr kơ̆ tiah ơm kis ring lơngai, lơngap lơngai, kơ̆ kơljap nàng bơtàu tơnguh, chồl pràn lơh broă bal uă lơgar, tàm tơrbŏ bal mờ mut gơ rờm bal dunia tài dùl dunia tơrlir, sàng goh, bơtàu tơnguh kơ̆ kơljap, gơ glòm jơh ală bơta mờ niam chài rlau.

Cau mblàng K’Duẩn