VOV4.K’ho- Di dơ̆ sa tềp bơhiàn yau Chol Chnam Thmay nam 2021 bơh làng bol kòn cau Khmer dê, ồng Phạm Minh Chính Thủ tướng Chính phủ neh pơyoa jơnau gờm chờ tus làng bol, oh mi mờ ală cau kơđơng yàng jơi bơtiàn kòn cau Khmer dê.

Ala mat Kuang đơng lam bồ Đảng mờ Dà lơgar, Thủ tướng pơyoa jơnau lùp còp, jơnau gờm chờ mờ kơ̆p kờñ ală bơta lơngap lơngai, niam bơnĕ ngan rlau jơh tus mờ làng bol, oh mi mờ ală cau kơđơng yàng jơi bơtiàn kòn cau Khmer dê. Tàm tơngai kòp Covid-19 kung gam gơlik geh kal ke, Thủ tướng pin dờn là mờ bơta lơh ngan bơh ală kấp, ală gah lơh broă mờ làng bol, jơi bơtiàn kòn cau Khmer geh wă rò sa tềp bơhiàn yau Chol Chnam Thmay lơngap lơngai, iang nùs mờ tơl làm bơta kuơ niam chài rơgơi, lơh jat niam ală bơhiàn ờs mờng niam bơnĕ bơh he dê. Mơkung, pơn jat tai lơh jat bơhiàn kờñ gơboh dà lơgar, tam klăc bal, lơh ngan bơsram, bơsram tàp, tơnguh uă bơta pràn să jan mờ bồ tơngoh jak, tryang tyồng lơh broă sa, lơh ngan lơh geh uă cồng nha dờng màng, pơgồp bơnah bal mờ dà lơgar lơh jat geh cồng nha jơnau kờñ, kơnòl broă bơtàu tơnguh lơh sa- mpồl bơtiàn neh geh ai.

Cau mblàng K’ Hạnh