VOV4.K’ho- Drim ngai 18/11, Thủ tướng Chính phủ ồng Phạm Minh Chính neh đơng lam pơrjum Chính phủ tơngume adat boh lam nhai 11. Dơ̆ pơrjum neh cribơyai bè 6 rơndap lơh adat boh lam: Adat khà priă (tam gơl), Adat Bảo hiểm y tế (tam gơl), Adat Bảo hiểm xã hội (tam gơl); Adat rơcang sơndră tam gơl priă tìs adat boh lam gơs priă dipal (tam gơl); Adat kă bro điện tử (tam gơl); Adat prap gàr (tam gơl).

Thủ tướng đơs pơn dut pơrjum

Ală kuang geh jơng tàm Chính phủ ring bal bè bơta kuơmàng, jơnau kờñ, gùng dà tam gơl. Bơdìh hơ̆ tai, ală kuang bàng kung đơs ală bơta ờ niam mờ rơndap lơh adat pal cih dờp tam gơl. Tơnơ̆ tŭ iat ală jơnau đơs cribơyai, Thủ tướng Chính phủ ồng Phạm Minh Chính sồr, broă bơt bơtàu mờ lơh sir adat boh lam pal lơh jat broă gơlik geh, gơtùi bơsong ală bơta ờ niam, kòl yan bơh adat boh lam gam geh ngui tŭ do nàng drơng ală jơnau kờñ ngan ngồn ai tơlik.

Cau mblàng K’Duẩn