VOV4.K’ho- Ngai 18/5, ồng Phạm Minh Chính- Thủ tướng Chính phủ lơh broă mờ Bộ Xây dựng bè bơta lơh jat kơnòl broă bơh gah lơh broă do dê, ală kơnòl broă gam gơ kòl, pal bơsong mhar, ală broă lơh geh bơta kuơ pơlam gùng, jŏ jòng, ală jơnau đơs, jơnau dan bơh gah lơh broă dê.

Lơh broă mờ Bộ Xây dựng, ồng Phạm Minh Chính yal dùl ròt pơlam gùng dà lơh broă jŏ jòng nàng bơtàu tơnguh gah lơh broă in tàm tơngai tus, bè bơtàu tơnguh ù tiah hìu đam pal pơgồp bal mờ bơta ring bal mờ bơtàu tơnguh mpồl bơtiàn; ai bơtàu tơnguh tiah drà gơ gơs là dùl gah lơh sa kuơ màng; sền dờng màng mờ bơcri priă di khà ai broă lơh rơndap ù tiah in; bơt bơtàu broă lơh gơ hòi gơ jà tă pơgồp ală priă jền, Thủ tướng đơs ngan, “gơ hòi gơ jà geh 1 đong priă bơcri bơh làng bol dê kung là kuơ màng ngan sơl”.

Yal mờ Thủ tướng, ồng Nguyễn Thanh Nghị- Bộ trưởng Bộ Xây dựng đơs loh ală cồng nha lơh geh tàm ală gah at bồ. Tàm tơngai lơh broă bơh nam 2016-2020. Bộ neh rcang lài kờp sền, sang tĕ bàr pe jơnau sồr tàm rơndap rơndồl, ờ ring bal đah ală sră ngal jat jơnau sồr bơh adat boh lam dê, sơlơ lơh niam wơl sră nggal. Bộ kung tơrgùm lơh jat broă lơh jŏ jòng bơtàu tơnguh hìu ơm dà lơgar, tus nam 2020, gùt lơgar neh mờ gam lam lơh pơgap 5 rơbô rơndap broă lơh hìu ơm, tiah drà pa (gơguh  uă rlau mờr 3 dơ̆ pơndrờm mờ nam 2010). Drà kă bro ù tiah hìu đam ờ hềt geh tềl tơngŏ gơlik geh bơta nisơna ờ bè ờs, ờ niam uă lơi.

Cau mblàng K’ Hạnh