VOV4.K’ho- Tềng đap ală bơta gơlik geh ngai sơlơ kal ke bơh kòp dờng Covid-19, gơlik geh jơnau ờ niam mờ ờ gơtùi gĭt lài, ồng Phạm Minh Chính Thủ tướng Chính phủ neh geh Công điện sồr pơn jat tai tơnguh uă cồng nha broă lơh rcang sơndră kòp Covid-19. Công điện đơs loh: tơl nă cau sền ờ sơ̆p, ờ rcang sền ngăc, ờ lơh jơh kơnòl broă, lơh jat ờ niam ală jơnau sồr, jơnau đơng lam bè rcang sơndră kòp pal geh sền gĭt kơnòl broă mpồl cau mờ cau dùl nă să is nàng lơh glài kràñ jat jơnau cih bơh Đảng mờ Adat boh lam bơh Dà lơgar dê.

Thủ tướng sồr ală kấp, ală gah sơnah lơh broă, ală tiah kờp sền, bơtơl, lơh sir ală jơnau sồr gam ngui tŭ do bè rcang sơndră kòp Covid-19 jat nùs nhơm tàm pà kấp, tàm pà gơnoar broă uă ngan rlau jơh gơ jat bal mờ broă tơnguh broă lòt sền, sền gròi mờ lơh jơh kơnòl broă ai ală kấp, ală gah, ală tiah in rcang lài, bơceh pa, nhhap nhar rcang sơndră kòp geh cồng nha ngan rlau jơh, mơkung kong kơnòl bè cồng nha broă lơh rcang sơndră kòp mờ bơtàu tơnguh lơh sa- mpồl bơtiàn tàm tơngai bè tŭ do.

Cau mblàng K’ Hạnh