VOV4.K’ho- Mho ngai 27/8, tơnơ̆ dơ̆ lơh broă mờ càr Bình Dương, ồng Phạm Minh Chính- Thủ tướng Chính phủ pơn jat tai lòt sền broă lơh rcang sơndră kòp tàm Đồng Nai, pơn dờm pơn điang làng bol lơh ngan tus  bal sơndră kòp.

Tiah sơn rờp Thủ tướng tus còp là Hìu niam chài xã Thạnh Phú, kơnhoàl Vĩnh Cửu, càr Đồng Nai tiah tơrgùm ală mpồl cau hòi jà, dong kờl nàng ai phan ngui, phan sa... tus mờ ală cau kal ke tàm ù tiah càr dê. Thủ tướng lùp còp, pơn dờm pơnđiang ală cau tus bal dong kờl is gam lơh broă tàm do, jờng rơ nùs nhơm tàm dong tàm kờl bal, nha ngan klòm nha sèt bơh làng bol dê, kơ̆p kờñ tơl nă cau pơn jat tai lơh ngan, ờ lời hĭu ală cau kờñ geh bơta dong kờl nàng bal mờ gơ̆p gờñ sơr lèt gan kòp jê. Pơn jat hơ̆, Thủ tướng tus còp, pơn dờm pơnđiang làng bol gam lơh jat broă lơh ai ơm yah ngài tàm bàr pe tiah tàm kơnhoàl Vĩnh Cửu mờ ƀòn dờng Biên Hòa. Tơnơ̆ dơ̆ lòt sền, Thủ tướng neh geh dơ̆ lơh broă mờ Kuang đơng lam bồ càr Đồng Nai. Tàm do, Thủ tướng sồr pal tơrgùm dong kờl ai kơnă hơ đơm in, ờ lời làng bol lik tàm gùng nàng gàr niam broă lơh ai ơm yah ngài ai gơ in niam. Pal gàr tơl niam rài kis mpồl bơtiàn, ờdo ờdă làng bol. Ờ lời làng bol ờ tơl phan sa, phan soh.

Cau mblàng K’Hạnh